羅敏莊演音樂劇壓力大搞到狂谷瘡

藝人羅敏莊（Mimi）身穿華麗宮廷服出席音樂劇首演活動。她表示已於昨晚為慈善機構預演了一場：「今日冇咁緊張啦，今次音樂劇有好大陣容，上台表演嘅超過二十人，仲有成隊管弦樂團，台前幕後人員超過150人。」她續透露將在音樂劇中擔任「八妹仔」角色：「我真係講嘢多過唱歌，不過尋日一路做就一路幻自己喺百老匯做緊騷，（會有幾多場？）會做九場，（老公撐足場數？）老公就未必啦，因為湊女重任交咗畀佢，佢係司機要管接送，同埋冇佢幫手睇住同照顧個女，我都好難維持到自己鍾意做音樂劇呢個嗜好，所以好多謝佢。」

至於音樂劇嘉賓，她表示分別邀請多位星級嘉賓：「我請咗宣萱、曹永廉、黃智賢、伍姑娘同江美儀，不過伍姑娘同江美儀就唔會今日嚟啦，但之後都會嚟支持我。」她又謂早前綵排時壓力爆煲：「因為成個劇本三分之二都係我講晒，所以之前瞓瞓吓都會醒同起身對台詞，又爆暗瘡，經期又唔準，好在有老公幫我對對白同幫我Drop低啲要注意嘅意項，畀意見我咋，（幾時同老公一齊合作演出？）冇人湊女係一個最大嘅問題，同埋我鍾意音樂劇，要有唱歌部分，而佢就係做純Drama。」