祖兒「樂壇女王十年稱霸」

勁歌金曲頒獎典禮，最後一個獎大玩創舉，特別設立「最受歡迎歌手十年大獎」，主持人一開始先賣關子，話呢位歌手喺1999年出道，攞咗最受歡迎女歌星十次，粉絲一聽到即刻尖叫嗌「JOEY」，其實獎名都話到明十年，唔使諗都知係容祖兒啦，JOEY上台嗰陣都有啲激動，佢話：「我嘅心情好好難形容，呢十年嘅光景都好難形容，每一次我攞獎都會叫我自己下次更努力，唔好令到大家懷疑我嘅實力，我身邊嘅全部人同事都充滿力量，多謝屋企人、朋友同粉絲，你哋畀咗好多力量我。」講完，阿Bob就以「樂壇女王十年稱霸」形容JOEY，JOEY亦即席為大家演唱好歌。