葉振棠開騷前冇Keep弗都咁瘦！

資深歌手葉振棠為紀念入行45周年的演唱會舉行記者招待會，他以一身帥氣西裝現身。期間獲新人余震東及黃宇希送上鼓勵禮物，好友露雲娜又送上象徵君子的蝴蝶蘭給棠哥。大會更向將於二月生日的棠哥送上蛋糕，預祝他七十歲生日快樂，氹得他眉開眼笑。

受訪時，記者打趣說入行45年的棠哥比譚詠麟早入行，他笑言：「早過佢，我睇住溫拿出嚟。」談到生日，他表示二月便會踏入70歲，問到將於三月舉行的演唱會是否就是最好的生日禮物？棠哥表示：「係呀，以前就會想喺紅館搞演唱會，但今次會喺文化中心搞，其實文化中心啲聲仲好聽過紅館好多。（有機會想唔想喺紅館搞？）都想，但好難攞期。」問到生日怎樣慶祝？他表示：「到時會喺外地工作，（70歲會唔會擺大壽？）暫時未知。（生日願望？）世界和平、身體健康、香港繼續繁榮！」

天生食極唔肥

棠哥亦透露今次會跟管弦樂團合作，屆時會唱三十多首歌。談到嘉賓，問到會否請好友露雲娜？他大賣關子，但透露兩位新人屆時會唱自己金曲。而形象設計方面，棠哥屆時都會穿西裝盡顯型仔一面，記者讚他身材keep得很好，他就謂：「我依家一百三十幾磅，醫生話我唔夠重，（食多啲嘛。）食好多啦，但食極都咁瘦。（係咪特登keep fit？）冇啦。」

談亞視拖糧嘆無能為力

曾為亞視唱過很多劇集主題曲的棠哥表示有留意亞視拖糧一事，他表示無能為力，惟有希望事情盡快解決，員工盡快有糧出。