龍劍笙12月演出十場《紫釵記》

粵劇名伶龍劍笙（阿刨）已落實今年12月，於香港演出十場《紫釵記》，這是她繼2006年演出34場《帝女花》後，再次在港演出粵劇長劇目，定必掀起撲飛潮。

名伶龍劍笙（阿刨）上月在香港完成25場粵劇折子戲《任藝笙輝念濃情》後，宣布將於今年12月23日至明年1月2日，假香港演藝學院演出十場《紫釵記》，阿刨闊別經年再演長劇，除答謝戲迷厚愛，亦有感當年獲恩師任劍輝指點，自己也希望提拔梨園新進，一盡粵劇承傳之責。

再同年青演員合作

主辦單位新娛國際負責人丘亞葵（Vigo）在電話訪問中表示：「之前一直游說阿刨演長劇，但佢擔心合作人選，直至上次做完《任藝笙輝念濃情》，佢同一班年青演員合作得好開心，覺得佢哋好有潛質，加上阿刨覺得佢師傅任劍輝教咗咁多嘢畀佢，佢都要為粵劇做番啲承傳工作，所以《紫釵記》除咗阿刨外，全部用新演員，花旦係喺《任藝》合作過嘅李沛妍同鄭雅琪輪流擔任。」

Vigo續說：「阿刨好重視今次project，佢原定做完《任藝》就返加拿大，但為咗《紫釵記》佢多留3星期，同我哋商討成個劇嘅安排、影造型照，然後至返加拿大過年，呢段期間佢仲不時提點新人演出注意事項。其實阿刨揀演《紫釵記》，係因為裏頭有好多書生、小姐戲，寫李益同霍小玉嘅感情亦寫得好到，阿刨好鍾意呢個劇。（只演十場，滿足唔晒所有戲迷？）阿刨相隔多年再演長劇，都知戲迷會好關注，但香港演出場地難求，請戲迷留意稍後公布嘅售票安排。」