朱千雪自嘲「大食懶」　仲鍾意啪手指！

藝人朱千雪到觀塘出席戒煙活動，她說：「 我由細到大都冇食過煙，爹哋媽咪唔食之餘，爹哋仲話食煙好嘥錢。（揀男友都要冇煙？）我盡量都唔會揀食煙嘅男仔，因為我都想佢長命啲！（拍Kiss戲男對手係煙民點算？）我暫都未遇過，但如果劇情需要我食煙，我會做個樣，拍嘢唔使真係吸落去，我唔識食，吸咗落去仲唔似。」

她續說：「講到壞習慣，我都有，就係懶瞓同為食，仲有『啪』手指，唔知係咪『啪』得多，我隻手好細，彈琴人哋可以彈到嘅音，我手細去唔到。我爹哋見我啪手指就鬧我，不過我啪手指嘅習慣其實係學佢。」