首個大型騷　馬嘉均「脫掉」回餽粉絲

歌手馬嘉均在九展舉行《再見昨天手語音樂會》，他開騷前接受訪問時，透露最怕記歌詞；至於手語部分，他指雖然是第一次以手語表演《獅子山下》，但綵排時卻很順利。另外他指因場地細小關係，音樂會中的戲劇部分有所改動，問到是否有激情戲？他笑說：「係嗌交戲，今次角色係得個諗字唔做嘅人，同自己性格相反，都係挑戰。」

自覺唱腔似城城

馬嘉均又指是第一次彈琴表演自彈自唱，更會模仿八、九十年代歌手如張學友、郭富城等唱腔，問到模仿誰最相似？他說：「最似城城。（會學佢跳舞？）唔喇，但唱譚詠麟嘅歌嗰陣會有八十年代嘅舞步。」對於門票售罄，馬嘉均坦言非常鼓舞，並指自己大碌人情牌，故獲多位圈中好友撐場：「開頭驚冇人嚟睇，呢個算係我最大型嘅騷，有咁嘅成績都開心。」

前往捧場的藝人有陳明恩、何雁詩、文恩澄、譚嘉儀等，馬嘉均甫出場已被觀眾大叫「除衫」，但他沒有理會，並發表感性宣言謂：「好開心，多得大家先搞得成個騷，尋找理想過程好難，我因為音樂失去好多，但朋友歌迷叫我唔好放棄，多謝大家。」雖然如此，但觀眾們仍是整晚不斷要求馬嘉均除衫，因他之前說過只要觀眾反應好便會除衫，最後他亦兌現承諾，除下皮褸展示健身成果，引來全場尖叫。