台灣凍齡美女　林心如生日兩「猛男」相伴

女星林心如有傳上年佢同台灣男星楊一展假戲真做，合作完之後仲被人發現佢哋同時間出現喺日本，不過事後二人就澄清冇拍拖、亦冇一齊去旅行。而今日39歲生日嘅林心如雖然要喺工作中度過，但依人身邊卻有猛男相伴！

尋晚林心如工作室就將佢哋預早慶生嘅相上載微博，仲留言透露：「感謝有愛的劇組，謝謝葉偉民導演和楊祐寧及其他劇組同仁的驚喜準備，謝謝大家的祝福和照顧，祝我們的電影拍攝順利~」原來伴在依人身旁嘅「猛男」係劇組導演葉偉民同郭采潔男友楊祐寧，唔係心如嘅真命天子，不過相中見佢左擁右抱咁同二人合照，而且滿臉甜笑，似乎十分開心。網友除咗祝心如生日快樂之外，仲希望佢可以喺40歲之前搵到好嘅歸宿。