不知何時有「糧」出　葉家寶不斷去追錢

葉家寶被問到牌費及拖欠人工加埋有幾多錢？他說：「依家欠係一個大數目，大家都計算到，每月發薪金要千五萬，牌費都千幾萬，依家12月、1月人工、牌費，仲有好快又2月人工，幾方面人工，加加埋埋真係要幾千萬，目前我哋有幾多錢，一路有評估、一路有變化，依家有一啲錢喺戶口，暫時睇唔到足夠一個月薪金，始終仲有今日同明天，有啲錢預計原本21、22日到，但到昨晚都未見到，同埋我哋有不斷去追，我哋等緊一、兩筆大嘅款項到位。」

問到何時可發放12月人工畀員工，葉家寶說：「我只係期望，所有資金唔係自己可以掌控，係由對方入款嚟我哋帳戶作實，如果話老闆畀我哋都可以掌控幾時畀，依家冇咁嘅可能性，其他資金掌控於第三者，我哋唯一盡最大努力，好多朋友都好配合，原本啲錢唔須要咁早畀我哋，知我哋目前困難早啲過落我哋帳戶，有啲預繳廣告費用，感謝支持我哋嘅客戶同朋友。（係咪有客戶特登唔畀錢？）每個唔畀錢客戶都有自己原因，我哋出唔到糧都有自己原因，我哋不斷用唔同方法去追，期望今日同明日收到，向今個月底發到薪金為目標，我唔評估可能性有幾多。」

亞視每分每秒都有變化

問到有否後備方案？葉家寶話：「牌費係2月18日第一期要繳交，仲有啲時間，經理人公司好快會有個好清楚講到投標者情況畀大家知道，同我哋股東商議，亞視有咩變化好快有明朗消息發放到。」

由於有員工向股東黃炳均借數千元，問到擔不擔心成無良顧主？葉家寶說：「每人對亞視依家情況都有唔同評價，亦都唔係管理層願意見到，盡咗最大努力去安排員工出糧，喺股東源頭着手，喺自己營運作改善，好不幸哋暫時唔可以解釋所有困難、問題，至於外界點評亞視，每人有自己講法，亦都好多人喺呢段期間加入我哋陣營，支持我哋撐落去、堅持。（有信心呢個月籌到千幾萬畀牌費？）2月18目嘅事仲有一段距離，依家亞視每一分每一秒都有變化。」