想當年着底褲拍戲！張智霖：睇番都汗顏

男神張智霖（Chilam）出席代言活動時，表示知道同場的劉心悠曾修讀有關藝術及設計的課程，所以他即把握機會邀請對方為他設計演唱會DVD封套，而心悠亦已初步答應。問到心悠是否收他友情價，Chilam說：「要講錢o架？錢嘅嘢無問題，交畀公司啦。能夠用咗心悠嘅第一次，喺設計上已經係難能可貴。」

佩服莊思敏影全裸海報

同公司的莊思敏續約三年，大搞gimmick拍全裸海報，不過Chilam就表示沒有留意，問到他能不能影全裸宣傳相時，他笑言：「我呀？我要加操先得，操練個操，要好fit先得，暫時未有咁嘅信心。呢排冬天好需要保暖，要食好多嘢，就嚟夏天就要加操。（你接受到裸露？）我開演唱會時已經成日露朱古力。（要露股喎？）要有好多心理關口要衝破，聽你哋講莊思敏張海報，我都好佩服佢。（拍戲好多人都露過股，發哥、青雲都露過？）拍戲有好多劇情牽引容易啲克服，拍戲我ok，之前我拍過部電影叫《金榜題名》有幕講啲黑社會入會儀式，我淨係着條底褲拍，不過最後呢幕刪剪咗，好可惜，當年有咁大膽嘅演出，依家睇番都覺得汗顏，依家我仲fit過以前。（會唔會畀老婆私有化咗？）係我私有嘅，唔會有關係，佢話有好嘢要益大家，希望真係好嘢。我要問吓我設計師（心悠）有咩idea先。」