幸福蠢女人黃翠如 愛在當下

20150131
東網電視
更多新聞短片
能成為「蜜」友大概總帶着愛!翠如冧爆憶述與Edwin如何化敵為拖友……
愛情事業兩得意的黃翠如,與蕭正楠公開戀情後愛得坦蕩蕩,Sweet到爆!兩人除性格相似外,又互相欣賞對方頭腦簡單,翠如笑說:「佢欣賞我夠蠢!」她則自爆鍾情男友自High的樂觀性格, 一句「快樂係會互相感染」足見翠如沐浴於愛河的幸福!兩人拍拖以來未曾鬧交,彼此互補不足,相當合拍。
急速發展
劇接劇的黃翠如與男友蕭正楠(Edwin)由陷入複雜關係瞬間修煉成簡單的愛,故事發展快過電視劇情節。去年中兩人傳撻着,惟當時Edwin與前度何傲芝的關係糾纏不清,令翠如由「宅男女神」變成「小三」!其後Edwin挺身護愛親自上節目交代,更公開表示力追翠如,危情迅速化解,兩人的愛情故事亦急速發展,自此愛得大方坦白,人前人後均不避忌晒恩愛,亦隨即得到外界認同。
對佢完全冇Idea
有指與Edwin拍攝劇集《師奶Madam》時撻着,翠如即澄清:「同Edwin開始拍劇嗰陣完全唔熟,當時對佢完全冇Idea、零接觸,所以專登睇佢套《巨輪》,佢拍過好多喜劇,由佢帶住我演,但一路拍,大家都一路搵緊大家嘅節奏,拍咗大半套劇都未熟,佢幾自閉,佢之後講番阿田(田蕊妮)都同佢講過要同對手多啲傾偈,先會快啲入戲有火花,最弊我都好自閉,大家都慢熱,頭幾日開工真係好沮喪,冇溝通,佢有佢嘅節奏,我直情冇節奏,後來放飯成班人會傾偈、傾劇本先好番少少!」
贏咗就覺得好威
翠如與Edwin初相識時原來不濟到處於敵對關係,兩人能發展成情侶可謂峰迴路轉:「我哋拍劇嗰陣幾敵對,好似比賽對手咁,大家都唔想輸,好緊張場戲嘅搞笑位喺邊個度,有時爆肚輸咗接唔到會覺得好失敗,贏咗就覺得好威,唔會禮讓,所以開工要保持作戰狀態,哈哈!我哋冇可能拍劇撻着,套劇幾乎冇浪漫情節,我哋拍呢套劇嗰陣完全唔熟,過程對佢冇私人感覺,只係一個對手,佢做嘢以外好安靜好少講嘢,成日匿埋一邊瞓覺!」
要多謝啲報道
兩人於拍攝尾聲突傳撻着,翠如更被指是Edwin與何傲芝的分手導火線,沒料到煲水新聞竟間接撮合兩人:「真正熟落要到煞科宴,大家拍完鬆一口氣,先有機會坐低傾吓偈,但煞科後幾日我就同洪永城飛去拍《走過足球聖地》,所以時間上唔需要解釋,我飛咗後突然好多我哋嘅新聞,大家多咗溝通都係因為呢啲新聞,真係要多謝啲報道,當時大家嘅話題係發生緊咩事?覺得啲新聞好奇怪,溝通多咗慢慢加深了解,初期都好多困難,外間好關注我哋,但慢慢建立感情,總算捱過咗!」
都有自閉
公開戀情後,翠如亦有問必答:「我哋冇共識o架,只係大家都唔聰明,亦唔鍾意講大話,同埋外間對我哋都係祝福嘅,所以就用最舒服嘅方法去回應。」兩人能成為戀人除性格相似外,同時欣賞對方的思想簡單直接,翠如認為男友最賞識她夠蠢:「佢要搵一個蠢過佢嘅人唔容易,我哋都係好簡單嘅人,都有啲自閉,拍劇時發覺大家原來都鍾意匿埋一邊自閉,對稿先會走埋一齊,對完稿又各自匿埋。」
自High傻笑
兩人拍拖後明顯人逢喜事精神爽,人前人後說話亦特別多,翠如說:「識耐咗就發覺佢係個好開心嘅人,成日自High傻笑,呢個都係吸引我嘅地方,原來佢好多嘢講。快樂係會互相感染,我都感染咗佢嘅樂觀,我哋嘅新聞都對我情緒有影響,覺得好委屈,佢反而冇乜嘢,仲安慰我,聽完佢講又好似覺得冇乜大不了,佢影響我好多,大家一齊後我個人都開心咗,對新聞唔會睇得咁重,佢都話我令佢再簡單咗,我冇乜購物欲,之前去日本旅行佢話我令佢連買嘢嘅意欲都減低咗,大家互相影響!」
未試過嗌交
旅行往往是情侶的重大考驗,因朝夕相對即見真章,因「了解」而分手更是屢見不鮮。早前與Edwin「蜜」遊日本的翠如則說:「其實我哋拍拖以來未試過嗌交,我哋性格應該比較難嗌交,連一啲爭拗都冇,大家都係冇乜所謂嘅人,價值觀、睇法、諗法都好似,所以暫時冇意見分歧,今次去旅行主要買啲做嘢衫,大家都覺得做嘢好似冇乜衫着。旅行時大家鍾意食嘢多過買嘢,好似好快肚餓咁,不停咁食。今次旅行佢發現我零主見,佢話佢已經冇主見,但我更加冇,惟有佢做決定,又鄙視我呢個旅遊達人,因為行程全由佢決定。」
結婚係兩回事
對於獲外間看好能修成正果,與Edwin雙雙步入教堂,翠如說:「咁結婚又係兩回事,聽人講拍拖要嗌吓交先好,咁又唔會希望嗌交,我怕嘈。結婚真係由細到大都冇諗過,之前覺得單身冇問題,因為有一個家姐三個妹,大家會陪大家一世。佢雖然比我傳統同有計劃,但我諗佢呢一刻都冇諗過結婚,依家最緊要開心,大家冇認真討論過結婚呢個問題,都係講廢話多,仲未入正題,哈哈!」
「前度」甩難
黃翠如與洪永城主持旅遊節目盡顯默契,外間亦希望兩人緋聞成真,惟翠如的真命天子卻是Edwin。事實上,翠如與洪永城私下老友鬼鬼:「我嚟到無綫個個都唔識,淨係識洪永城,大家互相加油,同佢係好朋友,佢幾乎第一個知我同Edwin拍拖。」她指洪永城不時提點她要對男友溫柔,並提醒她要學習照顧別人:「佢知我同Edwin拍拖都好開心,可能覺得甩難啩,唔使再同我傳緋聞,佢本身唔識Edwin,後來見過Edwin都覺得佢好簡單、好好,話好啱我喎!」而洪永城最近亦承認正全力追求唐詩詠。
師奶情深
翠如與黃智雯、梁嘉琪及簡慕華在《師奶》劇組成師奶兵團,戲外亦姊妹情深:「拍完劇大家做咗好朋友,嘉琪分析力強,智雯有啲驚青,簡慕華就專為大家解決愛情問題,而我就廢話多,食飯走埋一齊就變咗成班師奶咁乜都講一餐!」翠如的角色集野蠻、惡死及潑辣於一身,問到可會擔心摧毀BB形象?她笑說:「我不嬲都冇形象,有時化晒妝反而畀人話唔似我,啲人話鍾意我真嘅一面喎!拍《師奶》啲衫真係全部喺女人街買,對鞋九十幾蚊着住拍足三個月,着到爛晒仲要用啲黑色膠紙黐住繼續拍,角色真係好師奶,開工唔使化妝、衫又唔使襯,師奶Look令到我面皮更厚,開工瞓落地又得,亂跑亂叫又得。」她更愛上拍喜劇,皆因以往已習慣以最醜怪、最失禮一面示人,故已有不怕醜及面皮厚的拍喜劇條件。