傅嘉莉臨到新年腸胃炎兼發燒：希望身體健康

藝人傅嘉莉（Kelly）出席賀年活動，身穿紅色喱士連身裙的她還即席與小朋友大玩遊戲，並率先向現場觀眾拜年，更向現場的堪輿學家請教羊年運程，問是否屬迷信之人，她表示：「都會聽吓架，會留意吓生肖運程，同埋如果自己犯太歲，都一定會去攝太歲，今年我同媽咪都犯呀。（會搵師傅指教？）之後都要去問吓同聽吓自己事業、姻緣，不過最緊要係身體健康。（會擺桃花陣？）每年都會擺花，桃花就要問吓意見先，年年同爸爸行年宵都一定會買花，希望帶啲好運返屋企。」

至於農曆新年，她透露將在香港度過：「因為之前拍劇都離開咗香港成個月啦。（有冇假放？）應該都會有嘅，同埋就算幾唔得閒，年初一都會抽時間返屋企拜年逗利是。」她隨後又謂因早前腸胃炎的關係，故不敢亂吃新年食品：「雖然鍾意食，但都唔敢食油膩嘢，之前除咗腸胃炎，仲感冒搞到發咗三日燒，食埋藥都仲發緊，所以今年真心希望每個人都身體健康，同埋世界唔會再發生壞消息，我依家每日都食維他命C增強抵抗力，新年要小心飲食。」