成龍唔知祖名幾時獲釋　新年都未必一齊過

成龍到救世軍向長者派發羽絨，對於近日分別受勳拿督及成為全球最欣賞男士第四名，成龍表示驚喜又開心，感慨指大抵去年發生不愉快事情，故補償給他，望2015年有個好開始。

情人節唔送花畀老婆

忙於為賀歲片《天將雄師》展開東南亞宣傳的他，透露今早6點才睡覺，完成活動後又要趕為《天》片錄歌，晚上再到廣州繼續為宣傳做準備，預計新年也會於內地度過。

願做祖名後盾

問到情人節可會送花給太太林鳳嬌？成龍笑謂：「唔會，佢生日都係過咗先知，送得一年就年年都要送，好嘅就日日都係生日同情人節。」再問囝囝房祖名獲釋會否接他？成龍謂：「唔會，我都唔知佢幾時放，你哋仲知得多過我，探佢都冇，咁大個仔等佢自己打理，唔好活在我陰影之下。（咁咪好耐冇見個仔？）以前兩年都唔見一次，不過呢次我好放心，佢好似喺入面讀咗個大學咁，希望佢出嚟好好面對自己未來，我唔會為佢講任何嘢，但我同阿嬌係佢嘅後盾。（開唔開記者會？）等佢自己決定，同公司安排，我身份係佢老竇，畀佢自己揸主意！」

阿嬌唔見人同祖名一齊受罰

談到祖名庭上表現，成龍表示公司同事有將相關片段給他看，並指祖名表現不錯，有記者讚祖名比從前靚仔，成龍即打趣謂：「咁要坐耐少少，罰佢多啲。（阿嬌仲係唔出街？）唔見人、唔接電話添，話同個仔一齊受罰。（覺得自己教得唔好？）我唔敢問呀，你哋下次問佢，我哋都未探過個仔，媽咪就寄過封信畀佢，但唔知寫乜，不過過年都唔可以一齊過，等佢同媽咪過啦！」