君如風騷戰四男　唔怕老公呷醋

《12金鴨》舉行After Party，上文提到一班女星畀四名肌肉猛男一輪強攻後，最後身為主角的君如自然也要享受一番。雖然老公陳可辛在場，但她仍然「一打四」與四位舞男大跳辣身舞，分別自摸同撫摸猛男胸肌，十分風騷。

吳君如接受訪問表示：「天團好搞笑、好專業，下午（昨午）同佢哋已經講咗唔可以不雅，要老少咸宜。（驚唔驚陳可辛呷醋？）唔會，佢都睇到好開心，佢都話未經歷過，話好正。（叫陳可辛學「風火輪」？）唔好，我出去搵佢哋咪幾開心，哈哈。（事前知空降戒指？）唔知佢嚟咗，只係知有啲驚喜，呢啲嘢佢平時唔會做，其實有啲娘囉，哈哈。（感動嗎？）都有啲感動，原來女人好易氹，拍部戲都係想氹女人開心。佢仲話要我賺返粒石，套戲落咗好多本，今年票房希望有5,000萬。（賀歲片同發哥打對台？）年年都咁多部，發哥、家輝鐵腳，咪好囉帶動大家情緒，真係冇所謂，做人最緊要大家開心。（捲入合約風波的鹿晗點處理？）冇事啦，哈哈，我唔知發生咩事，唔識咁多法律，已經交咗畀律師處理，套戲仲有佢戲份嘅。」