唐素琪重現討論區！

大家仲記唔記得唐素琪係邊個呢？係咪個名好熟不過又醒唔起呢？其實佢係第一屆《美女廚房》嘅「美少女廚神」參賽者，仲拎咗季軍添！

最近有網民喺討論區發咗個帖，問大家仲記唔記得唐素琪、有冇人知道佢近況！2006年佢參加完美少女廚神之後，次年就加入樂壇做歌手，喺初出道嗰陣仲被安排同同門唱作歌手側田合作，又拍廣告，又喺側田嘅單曲《男人KTV》同埋《紅地氈》嘅MV入面擔任女主角，而佢自己嘅個人大碟《Chelsea》就喺2009年面世。

之後佢喺圈中浮浮沉沉又半紅不黑，最終喺2011年嫁畀拍拖6年嘅髮型師男友張思偉（Davy），喺陽明山莊泳池搞婚禮，做幸福少奶奶，冇再出現喺娛樂圈喇，難怪大家咁掛住佢啦！當年嘅「美少女廚神」各有發展，有啲依家已經成為當紅影星，就好似同唐素琪同屆嘅冠軍JJ賈曉晨咁，不斷有影視作品，仲同武打男星樊少皇打得火熱！

其他多人識、又活躍演藝圈嘅「美少女」仲包括依家戲接戲嘅陳嘉桓同何佩瑜！仲有無綫女花旦樂瞳以及陳嘉寶、洪卓立女友，原名叫袁家怡嘅湯怡。其他同唐素琪一樣做咗幸福人妻嘅就有余曉彤同埋年初先為富商老公「一索得男」嘅闊太岑潔儀！

網民有話兒：

fatfatXXXXXX：當年人正，笑起來正。細粒！

包剪XXXX：想當年係fans，但佢唱歌真係麻麻地

fake_XXX：唔講我真係唔記得左佢

3062XXX0：佢真係好正，又true 又pure

鐵X：當年m記廣告好深刻！