熱推《四個女仔三個BAR》洗腦歌

20150214
東網電視
更多新聞短片
法律界美少女齊齊跳頭盔舞,就算未必個個唱得,都一定睇得啦!

無錯,又係《四個女仔三個BAR》嘅時間,由新一代無綫小花陳凱琳、陳瀅、何雁詩、劉佩玥等主演嘅呢套新劇,真係叫好又叫座!劇集推出冇耐,無論劇情同感情線同四位「法律界美少女」都成為網民熱話,甚至連陳凱琳個鼻哥窿有冇鼻毛都成為網民茶餘飯後嘅talking point,威力絕對唔惹少。

為咗繼續炒熱個勢,主角之一嘅何雁詩喺facebook上載咗一首「《四個女仔三個BAR》洗腦歌」,仲留言叫網友多多捧場:「四個女仔跳舞,無見過啦(喇)掛!請廣傳!」

點解話呢首係洗腦歌呢?因為佢具備咗洗腦歌嘅一大條件,就係啲歌詞不斷重覆又重覆,包括「BAR BAR BAR BAR BAR SOLICITOR」、「BAR BAR BAR BAR BAR BARRISTER」,之後就係不斷 SOLICITOR同BARRISTER,聽完當堂覺得成個人都「律師」化咗。

而呢首洗腦歌其實係改編自韓國女團Crayon Pop嘅熱門歌曲《Bar Bar Bar》,唔知係想致敬定跟風,四位無綫小花學足Crayon Pop,着住顏色繽紛嘅短裙仔,又晒腿、又擰pat兼彈吓彈吓咁,兼且仲要七情上面咁扮可愛,真係相當放得開。咁當然,既然係硬銷律師嘅洗腦歌,裏面一定唔少得行政人員打扮o架啦!

四位小花咁樣落足力、發足電咁去sell套新劇,網民嘅反應當然相當熱烈啦!雖然有網民都大叫頂唔順,仲對佢哋嘅歌藝不敢恭維,但亦有人大讚首歌夠晒洗腦,跪求高清版之餘,仲有創意無限嘅網民,建議整番個「師傳版」,由劇中四大師傅蔣志光、鄭子誠、黃智賢同姚子羚領銜跳番同一隻舞,相信到時應該可愛不足,但爆笑有餘!

網民有話兒:

Lik xxxx Cheng:女神跳舞呀,好cute好搞笑呀~
Wai xxx:不如以後唱歌啦~改番隊名
Rxxxx Ng:超正!超強!求高清版!話說不如加個師傅版應該仲正,由蔣志光,鄭子誠,黃智賢,姚子羚來個師傅版可能Hitway(hit rate)仲勁!
Kahon xxxxxxx Chan xxxxxxxx:講!究竟係邊個諗出嚟既(嘅)!超可愛,正到爆,笑到有腹肌... XDD
Ken xxxx:睇完開心晒!努力!