張曦雯騷玉背撼贏「金咪」陳貝兒

陳貝兒與張曦雯（Kelly）一同出席無綫明珠台節目《奧斯卡®頒獎典禮》記者會，Kelly除了化身成為一個金人之外，更大露誘人玉背，令到記者朋友亦搶住影她的美背！不過陳貝兒亦不輸蝕，明日就動身去洛杉磯採訪奧斯卡的她都獲贈一個金咪，閃爆全場。

新年到訪洛杉磯

貝兒接受訪問時就提到今年要在洛杉磯過年，雖然老公沒有陪同一起去，更與老爺奶奶去日本玩冇法看貝兒主持的節目，不過老公也sweet爆指會錄低所有節目之後「煲返」！提到去洛杉磯的準備，貝兒就說去過幾次：「每次都會當第一次去做啦，希望帶多啲新嘢畀觀眾睇，其實奧斯卡前前後後嘅花絮呢，觀眾都會好想知道，所以今次會訪問喺奧斯卡煮咗廿一年嘢食嘅主廚，同埋嗰度會有個荷里活stylist幫我裝身。」之後貝兒更指最想見到的是福爾摩斯（演員Benedict Cumberbatch）！

情人節與愛貓過

至於大露玉背的Kelly接受訪問時就指自己今次的造型是要配合奧斯卡的金像獎造型，雖然現時比起以前做模特兒時保守，但如果是健康性感她完全不介意：「靚嘢係可以畀人睇嘅！」被問到情人節怎過時，她就表示很浪漫地與愛貓在家中度過，更說有相為證。不過她指自己情人節通常都單身，所以以工作為先：「慢慢啦，搵一個啱嘅人唔易，同埋我依家25歲，想多啲時間為工作打拼。」

祝福舊愛

提到Kelly前緋聞男友阿Phil日前與新歡胡杏兒高調shopping，Kelly就回應說：「我覺得如果咁open的話，兩個人一定係好愛對方，所以我都好祝福佢哋。」