吳君如想請發哥做「金鵝」

藝人吳君如於銅鑼灣為新戲《12金鴨》的台前幕後工作人員設下慰勞宴，更送上「紅鑽石」造型的蛋糕，寓意大家鴻運當頭！而老公陳可辛亦抽空撐場，與君如等人大擦美食。君如自爆今次設宴實行「一鴨幾味」：「今晚會抽獎慰勞劇組，請埋（金像獎）有提名嘅王菀之同陳可辛，順道同屋企人團埋年，一鴨幾味！」她表示會提供全鴨宴兼靚酒：「有八寶鴨、燒鴨、烤鴨、鮑魚同靚酒！如果票房好就再食一次！」

君如透露完成新戲宣傳後，將會一家三口去旅行：「去下陽光與海灘，去LA曬吓同歎吓！」她又大爆現時女兒好「黐身」，每日要「講掂數」先出門：「佢張開眼見我出門會好失望同扭計！」

問到君如有否打算再拍同類型新戲？她笑言要開拍《金鵝》，更想請周潤發坐陣：「咁就有齊雞鴨鵝，之前發哥提過做金鵝，我無任歡迎，等我出年諗多啲題材。（想打入大陸市場？）見步行步，要請得起發哥先！（送戲飛畀佢睇？）唔知地址，唯有周圍行捕（捉）佢！」提及日前陳可辛送上12卡巨鑽，君如笑說：「情人節禮物收咗就算，佢嗰份我爭住先，之後錫多佢兩啖！」