周殷廷將成新一代男神！

又唱得又跳得嘅藝人幾時都煞食啲嘅，好似環球男唱作新人周殷廷（Yan Ting）咁，佢首新歌《Gonna Be Alright》MV早排出街，已經有網民大讚佢有型有實力，好大機會喺樂壇跑出，有網民睇到佢張宣傳相，話佢個樣有幾分似型男安志杰，但睇完MV之後，有網民就覺得佢似「神算王」王梓軒多啲喇！Yan Ting除咗喺MV入面大騷舞技同個人技拋手巾之外，亦搵嚟同門師兄樂隊Mr.同做咗人妻嘅師姐吳雨霏（Kary）坐鎮，Kary仲幫師弟featuring，令MV睇頭頓時增加！

MV一開始，Mr.就喺酒吧入面夾緊Band，着住西裝嘅Yan Ting走埋去佢哋度打完招呼，之後就同一班男Dancers跳住舞咁唱歌，風格仲有種已故天王Michael Jackson嘅味道，到中段Kary就着住黑色皮褸出場Rap咗幾句，Yan Ting就喺隔籬好有默契咁伴舞，而尾段佢就孖住Dancers大玩拋手巾絕技，盡騷個人才華，有網民睇完個MV，就話首歌曲風同埋佢個樣都同王梓軒好似，但亦有人大讚首歌同舞步都好有質素，仲話佢把聲靚同有實力。不過有網民就彈個MV拍得差，話Mr.喺MV入面身打扮同首歌唔夾，仲話佢哋比起featuring嘅Kary出鏡仲多喎！

網民有話兒

Diaxxxxx：首歌好聽跳舞好好但係MV拍得差。場景同MR（MR.）好唔夾這類型音樂。

Vxxxxx Lee：首歌同舞步都好好質素但係比（畀）MV破壞哂（晒）... 見到MR（MR.）一身Rock打扮玩呢一類型音樂真係好奇怪. 同埋歌詞可唔可以用啲靚少少嘅font。MV好hea。

Kxxx Laai:幾好聽，個樣有啲似安志杰，真係又唱得又跳得又靚仔又盛，哈哈。

exxxxx:佢跳舞真心型，唱歌都幾好聽丫（呀），新人黎（嚟）講算唔錯啦。

Nichxxxx:個樣有啲似安志杰。

K Oxx:有以下comments:1. 條仔好正！！靚仔，有男人味，雄性激素強！2. 唱得幾好， 把聲靚有實力。3. 跳舞好睇，夠高大（身型幾正下應該）， 腳夠長。 4. 有韓星feel。應該幾有機會跑出！！！ 加油呀男神！！