恨做野蠻女友　鍾采羲自薦食蟲

模特兒鍾采羲（Iris）作為影壇新人，羊年希望大展拳腳做笑匠！自認充滿喜感的她亦不會刻意收起「Big爆」身材，實行邊Sell性感邊搞笑：「之前都拍咗兩套笑片，希望之後試多啲搞笑愛情片，本身個人都幾有喜感。想試吓拍《我的野蠻女友》呢一類戲，現實中嘅自己算係任性，發脾氣先會野蠻，如果好嬲可能會掟嘢。只要題材搞笑、唔係三級片就得，不過我又覺得唔需要特別收埋身材，着衫唔使包到上頸。」

作為新人的Iris相當「大貪」，志在過戲癮，望發揮玩樂的天性拍旅遊節目：「我係玩同食嘅專家，想試吓做飲食同旅遊節目。（怕唔怕變杜如風成為話題？）身邊嘅朋友都話好笑喎！最緊要娛樂到觀眾，去冒險食蟲，我都冇問題。」

望30歲前嫁人

雖然Iris依然單身，不過她就女強人上身，堅拒戀愛大過天：「暫時都係單身，之前掛住拍拖唔做嘢，真係好唔應該，搵到啱嘅對象之前都會努力工作。（多唔多人追？）唔多，要徵婚，遇到嘅男仔都唔適合我。之前有師父批過我，呢兩年內會結婚，聽住先啦！（家人催婚？）會提吓我，都希望30歲前結婚，生一仔一女。」