太監五虎齊聚賀年　翠如BB母愛氾濫

黎耀祥、蕭正楠、曹永廉、陳國邦、黃浩然、胡定欣等主演的新劇《公公出宮》即將開工，一班劇中好兄弟於初三齊齊到祥仔家拜年，蕭正楠帶埋女友黃翠如，而黃浩然及陳國邦就一家出席，相當熱鬧。祥仔太太Julia一早準備好盆菜，不過浩然的太太就有心帶來一大煲花膠、海參、鮑魚前來，眾人吃得滿足過肥年。祥仔接受訪問時坦言昨晚家中有如兒童樂園般，問有否向蕭正楠及翠如催婚，他笑言：「阿蕭咁大個人自己識諗。」即將開工的他指《公》劇拍到六月，之後亦要到開平拍外景，故新年都只是與家人聚聚、吃飯。」

而曹永廉的太太及小朋友因為到親友家拜年，故沒有前來，他坦言與祥仔、蕭正楠等傾偈到凌晨兩、三點，又指發現到蕭正楠及翠如、定欣同小朋友玩時，父愛、母愛湧出來。被指母愛氾濫的翠如接受訪問時謂：「啲小朋友好得意。（有冇畀人催婚、會否快生B？）見到浩然太太同羅敏莊湊小朋友都好攰，工程太偉大，要慢慢再了解吓先，而家畀心機做嘢先。」說到被兄弟催婚，蕭正楠笑言：「可能佢哋唔想再派利是畀我，我起碼要逗多幾年先。」問到想不想快些有小朋友時，他謂：「見到浩然、阿邦佢哋咁有父愛真係好難得，亦唔簡單，湊小朋友真係要好有精力先搞得掂。」