「戀情」告急？唐詩詠呻洪永城唔識做唔努力

一眾無綫劇集《四個女仔三個BAR》演員包括唐詩詠、姚子羚、陳凱琳、張繼聰以及黃智賢等，今日現身西九龍宣傳，並趁住初七「人日」向街坊大派紅雞蛋應節，吸引大量市民圍觀，導致一度要「封橋」。

自知一定嫁得出

早前洪永城公開向詩詠示愛，並揚言會展開猛烈追求成為圈中熱話，詩詠接受訪問時，被問到與洪永城之間的關係時，她笑謂：「仲有一條好遙遠嘅路。（即係有路？）我知我一定嫁得出。（情人節同洪永城過？）我同一班朋友食飯囉。（永城在場？）呢啲我自己知就得喇，總之就簡單，開心舒服。」

想學古仔做生意

提到《東網》影到詩詠去古天樂（古仔）開設的餐廳食飯兼打包一事，佢透露與古仔是於拍攝電影《逃出生天》時認識，並謂對該店的美食早有聽聞。問到打包是否給洪永城？她笑謂：「唔係呀，嗰啲係蘿蔔糕嚟。（有打算做生意？）都想，今次當係取經，我自己又鍾意食嘢，如果你話有間餐廳啲嘢又好食，又係自己嘅就真係不得了。（同洪永城夾份？）我仲有好多朋友架！」

冷待永城患病

她又指新年時，與永城都沒有到對方家拜年，並笑住「投訴」謂：「你睇吓佢幾唔識做！一啲都唔努力。」當記者提到洪永城病咗時，詩詠淨係話：「係？咁最緊要就係身體健康喇！」睇嚟洪永城真係要加把勁先至得喇！