薛凱琪信教後唔再怕醜：會大膽講我愛你

虔誠教徒薛凱琪（Fiona），早前在網上宣布將於下月2日舉行見證分享會，歷盡各種痛症的她，坦言因得到神的幫忙，身心才逐漸好轉，故希望跟大家分享多年來所經歷過的神迹。

另向來是「工作狂」的薛凱琪（Fiona），接受《東網》專訪時表示，新年要在工作中度過：「會錄音，因為希望今年底出到國語大碟，遲啲又要忙拍戲，所以變咗新年要做嘢，唔會有同朋友玩嘅機會。」談到過往難忘新年，Fiona竟然話「冇乜特別」：「因為我屋企好西化，冇全盒、冇揮春、冇人拜年、我哋都唔去拜年，爹哋媽咪都無畀利是我，所以新年對我哋嚟講淨係食蘿蔔糕、年糕。」

Fiona又表示希望今年集中音樂及電影發展：「嚟緊隻國語大碟有兩首自己作曲嘅作品，今次隻碟都會同方大同合作，佢做成隻碟嘅監製。（出國語碟想打入內地市場？）因為上次出國語碟已經係差唔多六年前，好多內地、台灣歌迷都叫我出國語碟，並唔係要特登打入邊個市場，每個歌手鍾意唱歌嘅時候就會想唱晒咁多語言嘅歌，所以今年會錄國語碟，都會同步做廣東歌。」

電影方面，她透露四至九月會拍三套電影，其中一套是港產歌舞片，並會跟馮寶寶演兩母女，其餘兩套則是內地愛情片。入行十年的她又自言很幸運，因為嘗試過很多不同範疇的工作：「好似舞台劇、自己做導演拍微電影同MV、好多服飾品牌設計，所以嚟緊想試開畫展同裝置藝術展，都係其中一個夢想，同想再試舞台劇。」

唔特別恨拍拖

熱愛工作的Fiona，坦言經過早前爸爸患心臟病一事後，更珍惜跟家人相處時間：「無論幾多歲，健康同能夠生存喺世界上都唔係必然，所以依家嘅我盡可能都會珍惜身邊人，希望令身邊人快樂，唔好怕醜同我愛嘅人講我愛你，提下佢哋身邊有人好錫佢哋，依家人愈大，愈大膽向身邊我愛鍚嘅朋友同親人講我愛你。」她又指工餘時間都會盡量陪家人：「喜慶日子都會帶埋爹哋媽咪同朋友一齊慶祝，我哋會一齊唱K、飲嘢、食飯，仲試過落蘭桂坊跳舞都一齊。」單身已有一段時間的Fiona，更坦言不心急找另一半：「我覺得緣份好神聖，如果天覺得我遲啲結婚先係好嘅，我希望等待最好嘅。（見到身邊朋友拍拖會唔會好羨慕？）唔會恨，因為每段感情都有自己獨特嘅故事。」

髮型：Jo Lam @ Queen's Private I

化妝：Jessica Chan

服裝：Mosca Over The Dead Brownie （Liger）