吳君如謝票宣布開新戲 力捧王菀之

20150228
東網電視
更多新聞短片
吳君如搭實王菀之到戲院謝票,Man爆!
藝人吳君如和王菀之(Ivana)為主演的賀歲片《12金鴨》到觀塘戲院謝票,又向觀眾大送金鴨版「Tea-Bag」(茶包),戲中大騷事業線的Ivana更獲影迷讚身材正。
放假不忘谷戲
剛從美國西岸度假返港的君如表示,坐了16個鐘頭飛機回來,感到好強烈時差,雖然身在外地但仍十分關心票房,並透露《12金鴨》票房已破二千萬:「去咗一個星期,時差咗四日,都好心急返嚟,根本冇放假,一路心掛掛,每日拍兩條片返嚟,一路放、一路拍。」
Ivana讚君如有男人味
提到君如憑《金雞SSS》角逐金像影后,而Ivana則入圍「最佳新演員」及「最佳女配角」,問戲中反串的她會否報名下屆「最佳男主角」?君如說:「我都唔知,男主角囉,我原本諗住報女主角嘅,但諗諗吓我喺戲入面係男人喎!(報Ivana做女主角?)王菀之今年攞咗先啦,下年搵佢做女主角,我有能力梗捧佢㗎!」
Ivana即笑說:「我下半生靠你喇,聽到捧字我就定喇,多謝,但我好重㗎喎,依家未有一件衫着得落。」並稱讚君如演技好,令人以為她是男人,故認為對方應報女主角。
「絕食」七個星期減肥
君如又指Ivana每次謝票均呻「好肥」,連Ivana也自爆被觀眾說肥,直言要努力為金像獎減肥:「觀眾話我戲入面好肥吓,我話係因為我專業,要有老闆娘嘅氣勢,襯番Wyman(黃偉文)。希望有條裙着得落,我打算七個星期完全唔食嘢,希望塊面削番啲。」
爆陳可辛愛「大包米」
自言為電影減到乜都冇的君如好羡慕Ivana的豐滿身材,又稱不想對方減肥而「降Cup」,兼讚她肥得入型入格,她笑說:「佢最勁係身材,嗰日見到佢『包米』我都呆咗。」Ivana即笑指君如原來只是想自己「包米」。問男友是否喜歡其身形?Ivana說:「暫時未嫌棄。」君如則搞笑說:「邊有男友鍾意洗衫板㗎!我嗰個(陳可辛)係鍾意手腳瘦,但又有『包米』。」
開拍《12麒麟臂》
另外,君如笑言打算開一套動作賀歲片:「開套新戲《12麒麟》,係《12麒麟臂》,一部動作武打戲,Ivana就梗係打人嗰個啦!」