無錫祈福　城城鞏俐靈山禮佛望新片大收

《西遊記之大鬧天宮》去年稱霸中、港賀歲片票房，續集《西遊記之孫悟空三打白骨精》加碼以逾5.6億港元打造，更邀得國際巨星鞏俐參演「白骨精」，以求雄霸明年新春檔期！《西》片去年11月開鏡，如今已近尾聲，星皓電影公司老闆王海峰日前率領眾演員，包括鞏俐、郭富城、馮紹峰、小瀋陽及羅仲謙等，遠赴無錫靈山舉行禮佛儀式祈福！城城見到鞏俐後主動握手問好，識做地大冧女方，而因拍戲受傷的馮紹峰堅持坐輪椅出席，更跪下誠心參拜！

城城皮膚敏感奉旨搲痕

一眾主演為新片施盡渾身解數，鞏俐也揚言：「我演的白骨精沒有突破就算失敗！」擔正演孫悟空的城城其實亦吃盡苦頭！一向貪靚的城城為拍攝不惜花數小時進行特技化妝，惟他出現皮膚敏感，導致甩皮兼搞到周身痕，要靠劇組安排Facial保養，以及城城經理人小美運藥舒緩敏感！城城雖然拍戲拍到甩晒皮，但他毫不介意為藝術犧牲：「呢套戲係入行以嚟拍過最辛苦，特技、化妝都用咗好多時間，戲裏戲外又好多動作，但只要觀眾鍾意都係值得！」劇組人員更笑言就算城城拍攝期間「身痕」，亦可奉旨搲痕，事關孫悟空最愛周身搲！

為求完美製作超支

飾演唐僧的馮紹峰其實先後因拍戲受傷兩次，去年他在無錫拍攝策騎戲時，不慎摔下兼被壓傷，更陷入昏迷，令在場的城城嚇至目瞪口呆！事後被送往醫院急救的他，幸在老闆王海峰探望時蘇醒，經一星期休養後出院！《西》片今次可謂用盡心思，就連老闆王海峰亦承認製作費超支：「今次喺化妝上花好多工夫，平均要用四小時化妝，有啲仲要用八小時，就連戲服都超過800套，有啲地方都過咗Budget，但冇辦法，拍得戲都預咗！武指洪金寶亦好嚴格，條威也線都執得好正，啲位又要對得準！」而為趕及明年新春上映，《西》片的台前幕後人員農曆年都要密密趕工，劇組更將移師新西蘭取景拍攝，屆時一眾主演亦會隨行！