江美儀唔介意男友演Kiss戲：會親自教路！

朱璇和江美儀到旺角為主演的電影《衝上雲霄》謝票，同行更有電影監製梁家樹，三人大派紀念品，影迷反應熱烈。

爆男友貪靚

江美儀透露已與男友吳君祥入場睇兩次支持，她說：「咁佢都有份客串，算係互相捧場！ （投訴你有kiss戲？）佢話鬆郁矇！但冇投訴。（男友有嘴戲點算？）咁呀，都要親自教路，因為佢演齡好低，要同佢練習多啲先得，等佢唔好失禮，輸人唔輸陣！」問到會否撐男友多在幕前露面，美儀笑言：「佢成日話自己靚仔啲就不得了！不過佢都係鍾意做幕後，雖然佢都好貪靚。」

呻單身冇人陪

同場的朱璇則戴黑超現身，她透露指：「自己眼腫，好感動，因為票房好勁，自己一落機就過嚟謝票。（去咗邊？）去咗北京玩。（冇仔陪？）冇呀，我擔心（意指單身）！」朱璇發現講錯後即場狂笑，她又指自己曾單拖入場支持《衝》，大呻冇人陪。