囡囡開口叫爸爸　劉愷威呵番醋爆楊冪

身為內地票房靈丹、有「三十億姐」美譽的內地女星楊冪，去年升呢為人母誕下女兒「小糯米」。雖然「小糯米」的廬山真面目仍然未曝光，不過楊冪和劉愷威兩公婆平時公開打情駡俏之餘，間中都會在微博分享湊女的樂趣！

愛女如命的劉愷威在微博自爆，已九個月大的「小糯米」會說話，第一句開口的就是叫：「爸爸！」聽到愛女「爸爸」、「爸爸」咁叫，劉愷威當然立刻開心Share，留言話：「小姑娘的第一句話......爸爸爸」並附上一大串飛吻符號！

劉愷威被「小糯米」冧到暈，但楊冪就一盤冷水兜頭淋！楊冪在微博接力話：「某人今天第一次叫爸爸，但是我一點也不吃醋和鬱悶，因为我發現她後來對着毛絨玩具也喊爸爸。」雖然楊冪玩踢爆，指女兒無論對人畜死物，暫時都一律叫「爸爸」，但錫到楊冪燶嘅劉愷威，又點會唔知楊冪明顯呷醋？見老婆成盤冷水淋落嚟，劉愷威不只照單全收，仲冧爆留言回覆：「哈哈哈哈...哈哈哈...哈哈哈哈...別吃醋啊...乖！」咁識賣口乖，唔怪得楊冪咁愛劉愷威，人前人後都話自己嫁咗個100分老公啦！