北京揚言唔諗退休　成龍：郁得就郁

向來喜歡挑戰自己、永不言休的成龍，於北京接受《東網》訪問時，即滔滔不絕地談及未來電影大計：「下個月會開唐季禮做導演嘅《功夫瑜伽》，去印度同當地片商合作，唔係淨係拍荷里活片，要放眼世界，投資額都大，同時亦都叫咗《天將雄師》導演李仁港安排下一套戲。退休？冇呢樣嘢，總之可以郁得就郁，荷里活嘅奇連伊士活84歲都仲活躍影壇，史泰龍68歲都仲打緊啦！」

遇好戲唔想放手

成龍又指不擔心體力問題：「依家有八部戲等緊我，之前拍《警察故事2013》已經叫緊唐季禮搞《功》片，拍緊《天》片就叫編劇搞下部戲，仲有《12生肖2》都多動作，不過到開拍可能我64、5歲。荷里活美高梅又想拍一個上海故事，仲有《Rush Hour 4》，呢啲都係我鍾意嘅戲，唔好放手。」

最近成龍與荷里活男星尊古錫及奧斯卡影帝艾哲倫保迪合作《天將雄師》，並揚威內地賀歲檔，原來當初成龍與李仁港傾劇本時，被對方敍述的故事大綱「化敵為友，為和共存」吸引，故願意籌集六千萬美金拍攝，並預料有錢賺便會將花紅撥落下部作品。

拍喊戲要尊古錫幫手

提到與兩位荷里活演員合作，成龍讚口不絕，除指艾哲倫奸到出汁外，更指對方即使鏡頭外亦相當入戲。談到在戲中化敵為友的尊古錫，成龍即自爆遭其中一場喊戲難到：「有場戲要我用箭射死佢，因為角度問題分開拍，導演要我喊到某一個層次，仲要拍幾次，尊古錫又喺現場，我喊唔到好尷尬，佢知道就主動問有咩幫到我，跟住就喺部攝影機後面畀戲我，做番本身佢嘅戲，結果我情緒即刻嚟，佢真係好嘢！」