捕獲發哥勁興奮　鄭嘉穎：佢化腐朽為神奇

鄭嘉穎為新劇《天眼》宣傳，談到日前開工期間野生捕獲神級影帝周潤發，嘉穎笑言「開心死」，又透露自己平日不會集郵，但當日是專誠要求發哥等他，然後匆匆拿回手機讓發哥自拍，他說：「佢揸機真係冇得頂，selfie技術絕對化腐朽為神奇，仲話有睇我套劇。」

嘉穎又指聽聞新劇口碑不錯，問到有網民惡搞其炸雞廣告，嘉穎笑謂：「場戲係有少少故意，廣告商都有贊助套劇，開場時都講我食緊炸雞，呢個係商業元素，不過件衫同廣告顏色一樣就冇留意，咁即係我都盡心幫佢哋宣傳啦！」談到戲中與楊怡激咀，嘉穎坦言該場戲將不時於劇中穿插，作為阿怡的回憶片段，故拍攝時要打醒十二分精神。