台灣晒自拍照　Hebe獲粉絲力撐舉腳冇難度

台灣女子組合S.H.E嘅三位成員向來冇咩偶像包袱，經常會喺社交網站分享其「醜態」。今晚，成員之一嘅田馥甄（Hebe）就上載舉腳自拍照，而且仲鬼咁得戚咁話：「還好有練瑜珈（伽），才能跟鞋子一起自拍！」不過網友就表示呢張相充滿咗「疑點」，覺得呢個舉腳嘅動作係非人之「舉」，但有粉絲就立即為Hebe澄清：「我相信是馥甄的腳，因為馥甄可是曾經塞進行李箱的呢！」如果Hebe連行李箱都可以塞得入的話，咁今次只不過係舉腳合照，對佢嚟講應該係易過借火！