網民熱話:重Loop他吧!他是歌手麥浚龍

20150314
東網電視
更多新聞短片
麥浚龍百足咁多爪,但他也是一名歌手,加上香港樂壇,確實少見這種風格的歌手,所以我們更加要Loop他的歌聽。
麥浚龍(Juno)嘅身份有好多個,包括歌手、導演、編劇、演員、服裝品牌老闆、光頭佬等......而Juno自2009年起參演《復仇者之死》、《保衛戰隊之出動喇!朋友!》等電影,成績都真係算唔錯,佢創作《復》片嘅劇本更獲得「第15屆韓國富川國際奇幻電影節」最佳男主角,以及「第33屆莫斯科國際電影節」獲得「最具文本哲學獎」。直至前年Juno親自編、導嘅《殭屍》仲令到佢有份提名金像獎「最佳新晉導演」添!數過吓麥浚龍喺影壇嘅出色表現,咁大家又記唔記得佢其實喺2002年係以歌手身份出道嘅呢?
今年一月嘅時候,Juno有首派台歌《念念不忘》,正正就係十年前佢嗰首《耿耿於懷》嘅下集,當年今日兩首唔同嘅歌,都係由黃偉文填詞、伍樂城作曲,聽落特別有味道!同時亦觸發網友神經,忍唔住Loop返Juno嘅舊歌,以前喺K房唱K歌嘅回憶湧返晒出嚟~就好似《沒有人》入面句「原來沒有 從來都沒有 纏綿邂逅 完全虛構」,唱出「獨」男「獨」女心聲;《金剛圈》嘅「你的金剛圈最好箍得更緊 令我的下世記得有過今生 來讓我命運和你箍緊」,令網友不禁掏心掏肺留言:「佢同我講過,到咗下世都要搵返我:-( 仲會愛我幾生幾世.....」
得啦!夠啦!唔好再講,見到個表情符號,隔住個mon都感受到分手嘅痛.....其他好歌《燈塔》、《借火》、《弱水三千》等等,都係聽出耳油。雖然Juno唔會唱歌唱到「高叫」,唱功一般,不過佢嗰種麥浚龍式唱腔,令網友話自己好似中毒咁,令人頹頹哋又好無力,當中嘅無力感,識得欣賞Juno嘅人一定點緊頭,Um.....冇錯,你懂的。
網民有話兒:
窒xx:聽麥浚龍聽到個人好頹好無力
我xxxx怪:LOOP咗JUNO啲歌好耐
xxxx救世主:本身靜(淨)係覺得佢係個拍《殭屍》個光頭佬,聽返佢嘅歌,搞到上癮日日loop,點算!
edwardxxxxx:分咗手後聽更加難頂
xxx人兄:好想識返個鍾意聽麥浚龍嘅fd