吳綺莉涉虐女：我唔覺得個女會自殺

吳綺莉接受有線娛樂新聞台專訪時，談到涉嫌虐待女兒卓林事件，她憶述當日情況表示：「我真係唔知發生咩事，我都幾日無瞓，嗰日我如常四點半接佢放學，但覺得奇怪見唔到佢，打畀卓林，佢話同老師傾緊計。點知到五點幾六點都唔見個女，跟住冇幾耐有兩個警察同老師行埋嚟我度，老師同我講話個女想自殺，我即刻望住個女，我嘅角度呢件事無咩可能會發生，我同個女每晚都傾偈，大家成日問係咪OK FINE？我覺得唔會咯。（因咩事報警？）因為老師同個女嘅對話，我唔知，我唔喺現場，我唔知真正發生咩事，呢幾個月無人搵過我，傾過任何嘢，我都好愕然。警方同我講，話我個女報警，告我虐兒，我好愕然，我無諗過搞到咁大件，我初頭以為扭計，我覺得冇可能，我所謂打佢，最多都只係...（說時輕推主持張學潤）（精神虐待？）我自問無。（你認知冇？）我唔覺得係。（警察問咩？）同我落口供話個女話我打佢。（有無表面傷？）我諗無，我真係無，我覺得係會睇得，我仲好大聲話真係冇。（點解會去你屋企？）因為要問我工人。（點解要搜你屋？）我真係唔清楚，我當時喺差館，我完全唔知發生咩事。（話有疑似毒品？）我真係唔知，所有嘢交晒畀律師處理。（警方未交代搜到咩？）大家都只係處理緊個女嘅問題，最緊要令小朋友唔好再受傷害同更加驚。」