楊怡唔興同羅仲謙慶祝節日：淨記得阿媽生日

鄭嘉穎、楊怡及林夏薇到坑口，為無綫劇集《天眼》宣傳，大會安排魔術師葉望風表演魔術，眾演員看得如痴如醉。

預告劇集尾段精彩

鄭嘉穎被問對劇集收視看法，他說：「要問番監製，不過依家唔同我初出道嗰時，嗰時收視30點叫OK，40點叫好，依家隨住網絡出現，改變咗人嘅娛樂模式，我阿媽都識上網啦！（你媽咪上網睇你個劇？）佢當然有睇TVB，但佢上網睇韓劇同大陸劇。觀眾眼睛雪亮，一定要拍高質素嘅作品至可以留住佢哋。」他又預告劇集尾段很精彩，呼籲觀眾要留意。

冇為意白色情人節

楊怡則透露未有為意昨天原來是白色情人節，她說：「係咩？完全唔知，我連中國情人節都冇為意，要人Send message我先知，白色情人節更加冇為意o添！（同羅仲謙都係唔重視節日？）我只係記得阿媽生日同埋啲大節日。（會補祝白色情人節？）唔啦，都唔興慶祝嘅，元宵都冇慶祝啦！」她又指有睇羅仲謙主演的《衝線》：「我有睇開頭，聽講收視都OK，（節目送單車酬謝觀眾？）係？等我都抽吓先！」