泰國結婚　伊能靜婚禮現場曝光

台灣美魔女46歲伊能靜今日喺泰國布吉島同細10年嘅內地演員秦昊結婚，佢哋舉行婚禮嘅現場相曝光，地點位於海邊附近，配合周圍樹木同草地嘅環境，極具陽光氣息，婚禮喺樂古浪度假區舉行，據請柬上顯示，二人今日上午11點迎親敬茶，下午兩點外景拍攝，4點半舉行婚禮儀式，夜晚7點半舉行婚宴，10點半就有餐後酒會，伊能靜仲叫出席嘅賓客喺本月24日前唔好將婚禮嘅相同訊息發布上網。據講尋晚原定伊能靜有搞單身派對，不過因為抽唔到時間而取消咗，今日嘅婚禮未有邀請圈中好友出席，但會喺31日喺北京宴客，畀圈中好友見證二人成婚嘅喜悅。