網民熱話 ：B.Gs新歌騎呢似早操？

近年韓國樂壇不斷有跳唱組合嘅加入，除咗賣唱功之外仲會喺MV入面大跳勁舞，令一眾歌迷有齊聽覺同視覺上嘅享受，香港樂壇都唔執輸，去年出道嘅跳唱女子組合B.Gs早前推出第一首歌《壯麗舞台》，MV亦已經喺網上推出，五位成員包括柔雅晴（Kavi）、方堯（Yona）、鄒莉盈（Ceci）、袁凱茵（Creamy）同周汶希（Jovi）個個以全黑短裙或熱褲性感打扮示人，佢哋喺MV入面邊唱邊跳，表現落力，不過有網民話佢哋唱功有好大嘅進步空間，又指舞步太騎呢同埋跳得唔夠落力，仲話MV入面不時有閃閃吓嘅特效，睇到人好頭暈咁喎！

MV入面，五人不時踎低扭動身體，加埋眨吓眨吓嘅effect令人頭暈，似足夜店跳舞女郎嘅感覺，加上歌曲嘅舞步簡單得嚟亦夠晒騎呢，而且好多位都跳得唔齊，佢哋一時趷吓籮一時撥吓頭髮，一時又雙腳跳起指天指地，網民就形容佢哋好似做緊早操！而去到後段合唱部分亦好明顯聽到五個人把聲唔夾，亦有網民講笑問佢哋係咪跳到攰得滯搞到把聲變晒，令網民無論睇同聽到覺得好攰！不過網民亦唔係一致unlike嘅，有人話B.Gs作為新組合嚟講表現算唔錯，MV sexy得嚟節拍感十足，仲好期待佢哋嘅其他作品o添！

網民有話兒

emxexxx：跳舞跳到好似做早操咁，騎呢到喊，最後合唱果part好怪。

怪XXX：effect太多睇到好暈，舞步唔掂，仲好似冇乜力水。

Wixxxx Lxx：加油！新人算幾好！期待聽其它風格既（嘅）作品。

Kx xx Wxxx：跳舞同唱歌都要更多改進，但起碼幾個女仔都唔算黑人憎，個MV睇完都唔算太差，新人嚟講都可以叫合格啦！希望將來會有更好表現。努力吧B.Gs！！

Axxxbxxx：加油加油！努力向前面的路進發。