黎諾懿否認與外父不和傳聞

藝人黎諾懿出席活動時，被問到有傳他與外父李志強不和一事，他表示：「都唔係第一次報道，冇乜嘢要澄清。（同外父同大舅不和？）梗係唔係。我結婚嗰陣出過一次，澄清咗我哋關係好。不過今次我多咗個爸爸同家姐，不過張相係我唔識嘅人，幾得意。（你唔打算幫外父打理美容生意？）冇乜必要，都已經上咗軌道，阿哥打理得幾好，結咗婚之後各自各發展，我有自己事業。（佢哋支持你做藝人？）絕對支持。我哋噚日一齊飲茶，一齊睇報道一齊笑，大家當故仔睇。有幾多係真大家知，所以冇乜所謂。噚日都有記者打畀我，我結婚嗰陣都澄清過，我哋關係好，冇乜特別。」

而有指外父沒收他的名車及別墅一事，他說：「我咁多年來都揸自己嘅車，住自己嘅屋。結婚唔代表攞人哋嘢，我靠自己ok。（你賣咗樓？）一早賣咗，由太太（李潔瑩）打理，係屬於「摸貨」。我哋兩年前買咗地起樓，有外國人見到好鍾意，出咗個好價，所以賣咗畀佢。（係投資？）係，都賺咗少少。（間屋係共同投資？）係太太投資，我啲嘢畀晒太太搞，佢叻啲。（間屋唔係外父送嘅？）唔係，結婚前我買畀太太嘅。」再問他會否不喜歡「五億附馬」的稱號？他說：「都澄清咗好多次，結婚係我同太太嘅事，佢屋企有冇都改變唔到。我哋兩家人相處好，係唔可以用錢嚟衡量。我舊車換新車都畀人話換沒收車，幾得意。」