陳凱琳唔敢做李嘉欣第二：我擔當唔起

前港姐冠軍陳凱琳（Grace）與季軍劉佩玥（Moon）一同為復活節活動擔任嘉賓，兩人即場創作復活蛋並交換作禮物。Grace表示也想造一隻給媽咪，因媽咪返了加拿大探弟弟，她很掛念媽咪，她待5月中拍完無綫劇集《殭》後便會於5月底到加拿大探媽咪和弟弟，順道探朋友。

拍大膽戲唔使清場

問她拍攝大膽露背鏡頭時可會感到尷尬？她說：「唔尷尬，用一個好有藝術感同美感嘅手法去拍，我前面貼晒大量膠布，最辛苦係要慢慢撕番落嚟，因為唔想整到啲皮膚紅晒。好多花瓣嗰張海報就有好多花瓣遮住，着咗黑色tube top同短褲打底，同埋陳山聰隻手都遮住咗好多，個角度係遮遮掩掩所以唔覺。（拍時有無清場？）無，有好多人行嚟行去，成件事好安全，拍之前同爹哋媽咪講咗，佢哋都好擔心，我問佢哋要唔要入去TVB睇，佢哋就話信得我過，信TVB。我覺得20年後拎番出嚟睇會好開心。」而她身旁的Moon就說：「我睇到時都覺得咁大膽嘅，幾驚喜，拍得好有藝術感。」Grace即笑言：「好多女仔都好羨慕，好特別，不如搵間studio我幫你影。」Moon聞言即表示要同《四個女仔三個bar》的陳瀅及何雁詩一齊影。

否認執四攤

問到Grace可會出寫真？她說：「我無諗過，今次已經好大膽，都有打底。」Moon坦言如果劇情需要和效果好，她也接受到性感演出，只要她有信心去做，父母會相信和支持她。而Grace就指自己的父親比較傳統，不想看她有Kiss的鏡頭。另外，有傳無綫開拍《呂后傳》，Grace執四攤演出？對此，她說：「我無聽過，唔係事實嘅報道，無人接觸過我。據我所知未咁快開拍住，我諗佢哋會搵個合適嘅人選，唔會急急拍而求其搵個人，我都係順其自然，等佢哋安排，如果搵我都唔會say no。（話捧你做李嘉欣第二？）我擔當唔起，自己唔鍾意比較，亦唔想出面比較，做好自己本份就ok。」