【全程口窒窒】Gordon@天堂鳥唔認係Mag小三

林欣彤（Mag）日前爆出遭前男友動粗，而佢前男友仲喺網上發文鬧爆Mag一腳踏兩船劈腿，隨即爆出組合天堂烏隊長Gordon就係二人嘅小三，而Gordon本人當時都冇否認。今日，天堂鳥三子Gordon、Lincoln、Tyrese出席關愛活動，難得見到真人，梗係問吓究竟咩事喇，點知佢就畀咗個Version 2出嚟。

問到佢有冇聯絡Mag關心吓對方，Gordon就話：「未同佢聯絡，我都有留意呢單新聞，尋晚成晚都好緊張。（緊張上咗新聞？）係...唔係，係緊張唔知點做。件事唔係大家諗到咁，我認識Mag真係只得四個月，我哋係成班朋友出去玩而認識嘅！」

問到同林欣彤係幾時開始拍拖，佢就話：「冇拍拖！真係！四個月前先識，時間唔脗合。」佢又話當時話同Mag冇關係係純綷反應唔切：「自己嗰刻都未控制到自己情緒，所以你見我個樣好驚，依家都好緊張，希望件事快啲過去，我會做好呢份工。」再問到點解當時問佢係咪「小三」時冇直接否認？Gordon就澄清：「我唔會做人小三，當時我係驚到唔識答，大家只係朋友關係。」Gordon又話認識Mag四個月期間，都冇發現佢有瘀傷。

驚青嘅Gordon，仲表示唔識得Mag嘅前男友，又話會等件事平息後再打畀Mag，又直言怕報道會影響到組合，即刻畀記者追問係咪否淨係怕影響天堂鳥，反而唔怕影響Mag？Gordon聞言即口窒窒話：「咁影響到自己就會影響到其他人，我唔想連累其他人。」對於有指Mag前度視佢為小三，Gordon就話：「佢男朋友冇講過話我係小三。（話你瞓Mag張床？）點會，我瞓我自己張床就有，瞓隊員張床都有。」講到有人覺得佢攞Mag嘅新聞嚟宣傳，Gordon都承認的確驚有人會咁諗。