羅仲謙睇化緋聞　拍《衝線》有心理準備

由羅仲謙（謙仔）擔正演出的無綫青春劇集《衝線》自開拍至今，劇中一班年青演員包括蔡思貝、吳若希以及沈震軒等型男美女整合，隨之應運而生是一堆異常混亂的緋聞，對於謙仔笑言早有預料，說：「有晒心理準備，大部分都係年青演員，蔡思貝又港姐啦，吳若希又係當紅嘅歌手啦！沈震軒，溫家偉，周志文咁實有喇，但我哋唔可以因為驚咗呢樣嘢而做唔到一班人嗰種感情，以我個角度咪當宣傳囉。」

對於今次能夠參演謙仔大表榮幸，笑稱自己年達三十是「青春水尾」，要趁魚尾紋未出好好把握機會，無懼緋聞纏身，說：「以前我都有少少介懷緋聞，但要睇吓你用咩心態去睇，你要明白自己係一個咩職業，唔可以因為唔好嘅新聞而影響你嘅工作態度，傳媒同埋藝人各有各工作，大家取個平衡協調，娛樂圈嘅遊戲規則就係咁。」

謙仔入行至今已達十一個年頭，無論工作或感情都開始踏上軌道，近年亦開始思考人生的完滿，說：「我會珍惜呢一刻我所擁有嘅嘢，無論我身邊所有人，事業，親情，感情咩都好，我好滿足、好開心得到現在擁有嘅嘢，而我希望可以呢樣嘢做一個根，將佢發揚光大。（是否考慮與女友楊怡結婚？）無刻意去諗，但係到我呢個歲數，老實講，工作，婚姻，有下一代，跟住退休，呢啲係每個人都必經，到我呢個年齡我覺得都要為我將來去準備。」雖然謙仔並無正面回答，但一臉正經的他表現出其成熟、認真。