謝安琪拍劇狂NG？鄭嘉穎：歌手較顧形象

藝人鄭嘉穎晚上請一班劇集《天眼》的台前幕後工作人員一邊睇結局一邊吃飯。剛在成都回來的嘉穎略現疲憊，他直言：「我有時差，因為我依家日日早上先瞓，但今朝早有活動，同埋今晚只係簡單食飯睇大結局。」

提到嘉穎有份拍攝的劇集《殭》被指抄襲《我和殭屍有個約會》、《美麗有罪》等劇。嘉穎對此笑言：「依個係我哋TVB強項，不嬲都係咁，唔係依套先開始。當然有少少類似就梗係有，出嚟內容唔一樣咪得。（你拍嘅時候有無覺得似？）我唔覺，可能真係有深夜食堂咁嘅景，但講嘅內容唔同，大家唔需要大驚小怪，慣啦！好正常！（有無覺得公司嘅劇要畀啲創意？）唔係我嘅管核範圍，我只要做好個角色，依啲要同監製傾。」

黎耀祥NG時拍爛手

另外，問到有指同劇嘅謝安琪（Kay）狂NG，係咪導致陸永黑面？嘉穎就直言：「我無見過陸永黑面，我都成日NG啦，有咩出奇？NG最少就是黎耀祥，11、12年前我同佢拍《飛短留長父子兵》，條友無NG過，黃嘉樂嗰陣做我細佬，我哋條氣唔順，終於等到祥仔NG，我哋即刻拍晒手。（有否覺得Kay係新人無經驗？）正常，我哋唔可以期望一個新人唔NG，黎耀祥世界得一個，全TVB得一個黎耀祥，NG好正常，唔好大驚小怪。（有指佢因為貪靚而搞到NG？）作為歌手同演員，拍嘅角度有少少不同，歌手比較顧形象，佢哋唔係全職演員，只係客串。」