存心爆粗　吳若希：係經過深思熟慮

吳若希（Jinny）在社交網站facebook貼圖，公開爆粗指摘對她母親意外事件作出人身攻擊的網民！事件惹來迴響，有人支持亦有人指她不應爆粗，而Jinny和弟弟在唱片公司老闆何哲圖及緋聞男友周志文、溫家偉的陪同下，傍晚到醫院探望母親，被問到發文爆粗鬧爆網民是否一時衝動？她表示：「我係經過深思熟慮先打，而且都係用番喺九點半劇集入面出得街嘅字眼！（怕形象會受損嗎？）如果我連自己屋企人嘅尊嚴都捍衛唔到，我唔覺得我仲可以係呢行生存！」

唔需要道歉

對於爆粗言論，Jinny認為自己無需向人道歉：「我覺得唔需要！如果要道歉都唔會係因為我講咗呢句說話，而係因為我係公眾人物，會教壞小朋友！」之後她一邊喊一邊語帶激動謂：「好想講多次！我吳若希雖然係個公眾人物、歌手，但唔代表我屋企人可以畀大家攞出嚟玩同講笑！我都唔允許呢件事發生！唔可以預咗就代表啱！」Jinny探病後即駕車至九龍灣跟甄澤權及林盛斌等進行拍攝工作。