鄭嘉穎認陳凱琳入屋　唔排除發展可能

鄭嘉穎被最新一期《好報》踢爆與23歲新一代女神陳凱琳（Grace）暗撻兩個月，Grace更被拍得到嘉穎大坑豪宅短聚。

嘉穎今日現身將軍澳電視城為劇集《殭》開工，並回應事件表示：「套劇未拍完已經咁多宣傳，開劇都係兩個月，咪即係一開劇就撻着？其實小弟搬咗去嗰度年幾，並唔係咩築愛巢，多謝大家嘅聯想力咁豐富。嗰日喺會展做完filmart，我就要繼續開工。之前同佢傾開電影，佢好上進鍾意睇戲，想睇吓自己有咩進步空間，我屋企就非常之多DVD存貨。但因為我要繼續開工唔喺屋企嘅，但我覺得想借嚟睇咪上嚟攞囉，反正有工人開門，其實就係咁簡單，唔好諗咁多，好多人都上過小弟屋企，唐詩詠、馬國明、曹永廉、林子善有排數喎。（成日上你屋企？）一次啫。（對Grace有冇感覺？）依家係朋友感覺。（有冇機會發展？）暫時都係朋友，任何嘢都由朋友開始，又唔可以講得咁死，依家就只係朋友、同事。（年紀差距會唔會係障礙？）小弟唔會考慮呢個因素，主要係睇溝唔溝通得到，timing啱唔啱。」

問到Grace會否再上他屋企借碟及還碟，嘉穎表示：「借完就算，邊有咁多碟，豉油碟就有，邊冇咁多碟，還就可以公司還都得。（見面尷尬？）一啲都唔會，大家做呢行，尤其係小弟，如果想我有老婆，照顧吓小弟，任何都係由朋友開始，朋友已經嚇驚人，高抬貴手啦。」