情史冇影響!陳凱琳力撐嘉穎唔花弗:人會變

20150404
東網電視
更多新聞短片
《好報》日前拍得Grace到嘉穎的住所短聚兩粒鐘,她今日首度為「穎琳戀」開腔,雖然口中唔認拍拖,但回答問題時顯得處處維護對方,兩人年齡相差22年,但凱琳就同意嘉穎所講年齡唔影響拍拖,似為戀情鋪路!

日前《好報》踢爆現年23歲的前港姐陳凱琳(Grace)與45歲鄭嘉穎疑似撻着,兩人被拍到前後腳到嘉穎位於大坑的寓所短聚近兩小時!事後嘉穎回應指兩人只是朋友,但又補一句:「任何嘢都由朋友開始!」似為戀情鋪路!

陳凱琳春風滿面

今日Grace與陳瀅、何雁詩及劉佩玥出席Fans聚會,與數十名Fans合照及玩遊戲,場面熱鬧!活動開始時,四女獻唱劇集《四個女仔三個BAR》主題曲,雖然Grace只是拍和沒有獻Sing,但High爆與陳瀅起舞轉圈,明顯春風滿面。

年齡唔影響拍拖

Grace受訪時對於提到鄭嘉穎的問題均小心翼翼作答,明顯有備而來:「其實我哋只係朋友,可能大家覺得拍劇就要傳緋聞。(嘉穎話年齡差距唔影響拍拖!)我都覺得唔影響,好多例子證明兩個人差距大少少,但關係都好好。(覺得佢追你?)依家真係朋友關係咋!(唔敢再上佢屋企?)暫時各有各忙,都唔會架喇!(下次約入戲院睇戲?)可能成班朋友睇戲都可以。(見面會唔會尷尬?)仲有一齊拍劇,有講番件事,得啖笑。」

撐嘉穎唔花弗

提到嘉穎過往緋聞多多,Grace似乎不覺得對方花弗,更相信「人會變」,擺明給予對方甚高分數:「每個人過去都有啲感情,但唔會影響佢依家,人會變架嘛!(有冇機會發展?)做住朋友先!(覺得呢個前輩點?)佢工作態度好好,對工作人員、身邊人都好好。(好照顧新人?)佢對個個都會,好似第一次拍劇,或者我有問題,我哋都會研究。(其實你鍾意咩男仔?)對朋友、家人好好重要,但都唔使諗咁多花巧嘢,識落一個人,就會發現佢某種性格好吸引,所以唔使鎖定某啲條件。」

四個女仔感情好

問到派對上有否炸雞贊助?因嘉穎是炸雞店代言人,Grace即尷尬避談:「有人安排咗架喇!一陣睇下佢哋嗌咗咩食物先。」問到四個女仔齊齊舉行Fans Gathering,會否鬥Fans多?Grace說:「唔會,好多Fans四個都咁鍾意,有時我哋得三個(人)合照,大家都會問另外一個去咗邊。」