娛樂專題：譚杏藍淘出千呎北歐磚屋

歌手譚杏藍一家由閣樓搬進旺角的千呎大屋，家中既有北歐及法國風情，又有中式木製家具，中西合璧。精打細算的她在淘寶覓得「平、靚、正」傢俬及牆紙，又將閨房布置得充滿少女味。她在家中掛滿照片，增添不少「人氣」！

創作歌手譚杏藍（Hana）家境不俗，原來小時候亦曾吃過苦頭、捱過窮，當時居住環境欠佳，有鬼又有老鼠。她憶述小時候一家四口住在舖頭閣樓，從事工程的父母靠一雙手努力工作，其後父親的業務漸上軌道並賺得第一桶金，他們才在旺角渡船街購入一個單位，相隔6、7年後再購得隔籬單位，將兩個單位打通為約1,000呎的大屋，生活環境大大改善。細屋搬大屋的Hana說：「當時買樓都係貪個海景，之前窗外未填海，可以見到好大個海景，睇煙花仲好清楚添！而且呢個單位好四正、好開揚，唔會三尖八角。」

中西合璧小天地

客廳連飯廳極寬敞，牆身以白色為主，Hana在梳化及電視後的牆壁黏上仿磚作裝飾，為客廳增添北歐風味，四周又擺滿用陶瓷花瓶栽種的植物，飯枱則選用中國風桌椅組合，Hana說：「媽咪鍾意古色古香，我就鍾意北歐同法國風情，嗰時一裝修就嗌交，後來融合做中西合璧風格，各自有個小天地。」飯廳旁的開放式廚房很企理，飯煲、煮食爐及雪櫃等一應俱全，但Hana坦言極少用廚房：「一年都唔知有冇煮6次，出去食飯仲平。我識煮西餐，通常秋天約朋友食大閘蟹先會下廚。」

慳得一蚊得一蚊，精打細算的Hana特地上網「淘」傢俬：「為咗慳番裝修成本，好多傢俬都喺淘寶買，好似梳化、床、廚櫃、廁所、牆紙同窗簾等，起碼慳咗一半！呢張L形梳化連運費都只係1,600蚊，啲牆紙喺香港買要幾百蚊一卷，淘寶就50幾蚊一卷！張床我花咗一日自己裝，本身鍾意砌積木，所以好享受過程同成功感！」

掛名畫怕作狀

Hana現時與母親共住，飯廳是媽咪的工作小天地，客廳則是二人的共用空間，四處都擺滿其眼鏡、裝飾品及「笑哈哈」收藏品等。而家中的鋼琴、牆壁及雪櫃都掛滿照片，記者笑稱布置予人自戀的感覺，她笑說：「你唔愛自己，仲邊有人愛你？依家得我同媽咪住，屋企好似少咗啲人氣，加啲相感覺熱鬧啲。我最鍾意鋼琴上面嗰3幅畫，其實大家都想掛畫，但覺得掛《蒙娜麗莎的微笑》同畢加索太過作狀，我就提議掛自己嘅相，家姐笑住話仲作狀！後來我用Photoshop加Effect，再Send去淘寶整咗3幅版畫。」

自製魅力電眼

提到平日製作的短片，Hana立即搬出錄音用咪高峰及結他自彈自唱，又推介拍片用的環形燈：「用咗環形燈打光，對眼會有個圈，感覺Bling Bling啲，鴨寮街賣二百幾蚊。支咪係新買嘅，連埋Interface超過4,000蚊。」

亂中有序

Hana的睡房是家中主要拍片位，貼有花花牆紙，房內掛滿綿羊公仔、波波及相片等，為閨房增添少女味。雖然整個房間「花碌碌」，但未有予人凌亂感覺，她說：「我鍾意買嘢同儲嘢，但追求整齊。我要知道啲嘢擺喺邊，要一眼望到，所以唔會亂咁擺！」