吳若希開心媽咪已甦醒：好多問題都解決到

歌手吳若希（Jinny）母親早前因炒單車重傷入院，一直在ICU，今日吳若希與細佬齊齊現身醫院探望母親，其好友Kellyjackie亦有前往醫院。而於晚上約7時20分，Jinny踏出病房，並表示母親進展好大：「佢依家可以擘大眼，都可以望到每一位，講嘢都有反應，叫佢做啲握實拳頭同向左右望嘅動作都做到。依家醒番好多問題都解決到，一直有好轉。」Jinny續說：「媽咪之前左邊傷咗，叫佢擘大左眼，但要等初步進展再大啲先可以check到隻眼有冇事。（媽咪擘得大眼你好感觸？）都有，因為日日自言自語咗啦咁耐，feel到自己講嘢有用，我都有讀晒啲人寫嘅嘢畀佢聽，Sisley（蔡思貝）仲話要請媽咪飲茶，媽咪聽到都有反應同埋笑，進步好大。」

甦醒程度夠可離開ICU

問到今日可有見醫生？她表示今日沒有：「不過護士話如果覺得有反應，就可以試吓抆一啲（幫助）呼吸（嘅）喉，至於小手術，依家清醒咗就可以唔使做。（幾時可以離開ICU？）見完醫生先知，如果抆咗呼吸喉，過幾日都冇事就可以離開ICU，但實情未清楚，因為佢依家嘅甦醒程度得3-4度，要5度或以上先叫清醒，先至可以自己呼吸，所以佢依家要清醒多半度先得。（媽咪有冇試吓講嘢？）佢仲插緊喉，佢有諗過抆開插喉嗰支喉（管），但畀我哋阻止。」

欣賞細佬堅強

她又大讚細佬好叻：「我試過問佢假設性問題，問佢如果媽咪醒唔到會點？佢就話唔知，但細佬都已經好盡力做好自己，好appreciate（欣賞）佢。（咁自己仲撐唔撐得住？）我都盡量keep住身體健康。」問到會否搬去另一間醫院更方便自己？她表示不會：「因為呢度嘅腦科比較勁，而且有跟開嘅醫生，服務又好好。」她又謂前兩日自己心情不好，並說：「因為隔籬病床同媽咪同日入嚟，但好快就好番，所以自己好羨慕。」