娛樂專題：馬國明做厭筍盤想學壞

被稱為娛圈「筍盤」的馬國明，出道以來憑乖仔形象「入屋」， 一直不乏觀眾緣及「霧水情緣」。但原來他對「乖仔」及「筍盤」等稱號不太受落， 更講明想變壞，化身奸角！他不但大方盤點緋聞對象，更開腔自爆最怕遇上公主病女友！

呢排接幾套都係喜劇，我自覺唔係好叻搞笑，但都唔介意磨練吓笑功。其實我鍾意做奸角，好似之前喺無綫劇集《真相》客串演洗黑錢嘅會計師都好開心。因為我形象蠢蠢哋，做衰人反差會好大。入行咁耐都想變吓戲路，增加新鮮感，就算係敏感題材，要打人或非禮人嘅角色都冇問題。我唔介意畀觀眾罵，好似之前《真相》套劇出咗街，我落街畀人罵好衰，感覺個角色成功咗，希望有機會演多啲陰沉同奸險嘅角色。

攞獎講運 買樓實際

　

我今年有套《流氓皇帝》會播，憑套劇攞視帝的可能性唔係冇，但要講運氣，觀眾口味好難估。我對獎項野心唔大，想搵錢買樓多啲。其實電影方面都有人搵我，但如果要去外地拍攝，時間又太長，就會擔心屋企人。我同無綫仲有兩年約，有完約藝人想自組公司，但我未諗。我做生意麻麻哋，又唔夠狠，會畀人呃晒啲錢！都係儲錢買樓啱我，不過睇好耐都未睇啱。因為我打算同屋企人住，如果結咗婚就買埋旁邊個單位住，依家要努力搵錢買兩間屋先！

解構對象 笑看緋聞

大家成日用筍盤形容我，實際上我唔多enjoy，因為唔覺自己筍，未結婚同事業唔差嘅大有人在。我唔抗拒因為咁而多緋聞，當為工作宣傳，雙方知咩事就得。好似之前話唐詩詠黐實我影相，實際上當晚老友食飯，佢咩人都黐，哈哈。而朱千雪就影到同我同車，我成日認為男仔要gentleman，夜晚12點做完嘢，順路車埋同事返去好正常。況且嗰晚車上仲有另一位同事， 雜誌用「斷正」字樣遮晒佢個樣，激到佢紮紮跳。對於緋聞都係笑吓，點都好過話同人不和。

唔buy長跑 怕湊公主

相士話我2018或2019年有機會結婚，到時搵到啱嘅女仔拍一年就可以結婚！我份人唔buy愛情長跑，見啲人一跑完就離婚，似乎拍得太耐反而唔好。爸爸、媽媽對新抱都冇咩要求，斯斯文文就得，佢哋都冇催我結婚。至於我份人咁悶，真係要搵個冇咁悶嘅女仔，最好佢帶我周圍走。我唔介意畀佢話晒事，大家諗啲，give and take ！有啲「小公主」要我幫佢設計晒啲嘢，我會搞唔掂。晚晚傾電話都唔得，咁我第二日要返工，點晚晚傾？真係要互相遷就。

身邊朋友成日話介紹女仔畀我識，係同徐佳琦呢個朋友食過兩次飯，間唔中有短訊聯絡，大家又忙住搵銀，冇特別發展。對於拍拖，如果穩定咗我會好大方，但最驚未開始或了解中就畀人話拍咗好耐拖，好尷尬！

誓會生B 三年抱兩

我家姐之前生咗個B，等我父母有孫抱！我自己都鍾意小朋友，將來都會生B。不過兩至三個就夠，仔女都冇所謂。其實我全部生女都得，做爸爸都鍾意女。如果生仔就一齊踢波，最緊要有人陪佢，一個小朋友太悶喇！我唔使做嘢就一星期踢至少三次波，都算係我唯一減壓方法！

後記：風趣健談不木獨

提起馬國明就自然諗起「筍盤」及「天然呆」，因為他形象健康又乖仔。受訪當日見他健談風趣，更不避諱地「開心Share」戀愛觀！他態度如此大方回答感情提問，實屬少見。外形及性格都如此討好， 被大眾封為「馬明BB」實在當之無愧！