陳山聰相約星級跑男裸住跑

藝人陳山聰熱愛跑步，佢仲同胡諾言、胡定欣及胡蓓蔚等人組成明星跑步團Crazy Runner，齊齊跑步養成健康生活，難得齊人又咁好天氣，佢哋梗係要約埋一齊跑步啦，陳山聰、胡諾言同謝東閔都有喺微博上載佢哋開心合照，陳山聰留言話:「Crazyrunner臨別秋波，感謝所有兄弟姊妹臨走前陪我跑一轉淺水灣10km，豹嫂胡蓓蔚成功挑戰10km。」見班男仔個個跑到赤裸上身，大騷結實肌肉，胡定欣及胡蓓蔚兩個好姊妹亦以背心短褲上陣，佢哋仲喺沙灘上開心到飛起添！