究竟係咪大肚？周汶錡踩斗零踭現身

名模周汶錡（Kathy）晚上與老公Julien Lepeu出席珠寶展，下個星期就懷胎7個月的Kathy，身穿露背Deep V、前短後長的藍色晚裝，腳踏6吋斗零高踭鞋現身，真係一步一驚心。雖然周汶錡自己唔驚，但佢老公就全程都好緊張，係咁拖住老婆行，行嗰陣又係咁望住老婆對腳，真係睇見都戥佢哋牙煙。

Kathy受訪時笑言，是上車時才換上高跟鞋：「對鞋有platform，所以好舒服，唔好再講啦，我會畀人鬧。（畀邊個鬧？）身邊啲女性朋友都好緊張。」

食極唔肥

提到下午Kathy妹妹周麗淇指Kathy唔聽話食錯嘢，Kathy直言：「因為噚晚食嘢好急，飲咗個湯之後突然想食Yogurt，之後絞肚痛，好想扣喉，但瞓陣又冇事，好驚同埋好後悔。（有冇去醫生度check？）咁又冇check，食嘅時候覺得應該冇事，只係好後悔。我已經食好多嘢，每日食三、四餐，每餐都好豐富，醫生話我應該肥啲，我夜晚食pasta都食雙份，但唔知點增磅。」

談到Kathy太瘦，問到肚裏面的BB是否啱size？Kathy透露：「醫生話正常，身體、腳、手嘅長度都啱。」

真空上陣嫌cup數唔夠

另Kathy被記者發現疑似真空上陣，Kathy即笑笑口謂：「Ok啦，依家有少少身材，不過比我想像中少（升胸得少），人哋話懷孕會升2至3級，我好似只係升咗半級至1級，想試吓個感覺。（想唔隆胸都試到？）覺得過程好得意。」

成日撇老公出街

對於今次老公陪同出席，Kathy笑言對方並不是緊張才陪同，問到老公有否抽多點時間陪自己？Kathy笑言：「佢依家成日話我自己出街，因為依個月好多朋友都想見我，所以日日都要出街。（幾時停工在家安心養胎？）生之前，可以的話，我想唔腫、而且見得吓人都會出去，聽人哋講一個月前會水腫同埋好重，所以都未知。」