周杰倫昆凌各有各忙相見難

台灣天王周杰倫（周董）同老婆昆凌近日各有各忙，周董噚日抵達澳門出席「第19屆全球華語榜中榜」頒獎禮，連奪兩獎嘅佢實在可喜可賀，周董除咗喺典禮上壓軸演出，仲急不及待喺後台捧住獎座影相，認真威水！佢喺官方微博留言話會將獎座帶到自己經營嘅餐廳同粉絲分享：「這是今年得到的第一個獎，我會請閒魚帶去真爱范特西KTV跟大家分享喔！」

至於昆凌今日就到咗洛杉磯工作，佢話：「到LA咯！這一次要跟着HM中國一起去Coachella音樂節，在試穿不一樣的波希米亞搭配，好期待喔！」陀住B嘅昆凌仲換上唔同嘅時裝大玩自拍，其中一套衫腰間位置有流蘇設計，腹部若隱若現，令佢更加顯得纖瘦，真係唔講都唔知有咗！