同行日本撞到正！小豬逼住認周揚青係朋友

台灣歌手羅志祥（小豬）去年爆出同大陸網絡紅人周揚青嘅緋聞，雖然佢哋唔認，不過近日又被網友發現佢哋同遊日本東京，直指二人熱戀中！上星期小豬帶埋媽咪去日本度假時，有網友大爆同行嘅仲有周揚青，佢同小豬仲戴住情侶手鍊、頸鍊，全套情侶裝上陣！

開頭小豬班粉絲都唔信，但係上年話緋聞係「捕風捉影」嘅小豬，尋日首度透過經理人公司開腔承認雙方係朋友，不過就強調今次同遊日本係咁啱撞到周揚青，於是就一齊行街，仲話啲衫人人都買得，唔需要大驚小怪喎！嘩！小豬同周揚青竟然有緣到喺日本東京都撞到，仲要撞埋衫添！可信程度有幾高，請大家自行判斷。

今次小豬將關係升呢為「朋友」，有唔少網友都覺得係逐步認戀情嘅表現，粉絲們仲預早祝賀佢添！