陳玉蓮自資培育山區小孩：不接受捐贈

剛從廣州返港的陳玉蓮（蓮妹）以大使身份出席「香港復康力量二十周年晚宴」，她自言近年留在廣東一帶時間較長，去年則從雲南帶了一個小孩回廣東，又透露與友人在國內組成私人團隊，請來老師向小朋友教授日常生活事，以及中、英、數等學校文化：「好多小朋友喺國內讀完初中三，屋企冇錢就唔會再上中四，因為讀中四要自己畀錢。」

培養小朋友　資助其家人生活

她解釋並非領養小孩，只是去偏遠地區幫助家境有困難、年約12到17歲的小朋友，培養他們之餘，更資助其家人生活：「我哋唔係慈善機構，係個人行為，依家小朋友人數唔多，因為所有費用我哋自己出，除咗教佢哋、同我哋生活，我哋每幾個月就畀錢資助佢哋嘅家人，因為好多山區小朋友好早出嚟做嘢或耕田，我哋呢幾年去唔同地方。好辛苦先搵到適合培養嘅小朋友，另外又畀錢佢家人，等佢哋安心啲，唔會想叫小朋友返去，白費咗小朋友嘅前途。」

靠自己力量感動政府援助

陳玉蓮又說小朋友被培養後，會繼續留低做慈善：「佢哋唔係同我哋打工，佢哋嚟學嘢幫番人，令佢哋自己覺得唔慘，呢種係身教。」問到花了多少錢落培育工作？她笑謂：「都唔少錢㗎喇，我哋做咗多年，唔知使咗幾多，但幕後好多人支持，我哋不接受捐贈，係自給自足。」又指因為工作並未成立基金會，故在大陸向政府求助時遇上不少困難，她說：「成立基金會好多嘢要交代，所以我哋寧願辛苦啲，向政府敲門，用陳玉蓮過往嘅嘢感動政府幫我哋。」